Logotipo.png
Ypykuéra ñe’ẽporãhaipyre ñoha’ã ohenói Amérika haihárape
Publicado: 04/27/22 05:15:a. m.

Ojehechakuaa ha oñemokyre’ỹ hag̃ua ypykuéra ñe’ẽporãhaipyre, México guive oñeguenohẽ ko ñoha’ã 2022 hérava Premio de Literaturas Indígenas de América (PLIA), ohenóiva mayma ypykuéra América tuichakueguápe, toĩ oĩhápe, ohaíva mombe’urã. Ikatu ojeike ko ñoha’ãme 2 jasypoapy peve, ko 2022 arýpe.

Mombe’upy oñemog̃uahẽva oñe’ẽva’erã ypykuéra arandupy ha iñe’ẽnguéra rehe, ko’ãva apytépe, ikatu ojehai ojehaiséva rehe. Ikatu oñemog̃uahẽ peteĩ térã hetave haipy ha mbykyha guivo oguerekova’erã 60 togue ypykuéra ñe’ẽme, ha oñembohasava’erã ñe’ẽ ojepuru katuíva upe tetã haihára heñoihaguépe.

Mayma oikeséva, omog̃uahẽva’erã ihaipy internet rupive www.cunorte.udg.mx/plia pe; upépe omyenyhẽva’erã peteĩ kuatia, ha ohupiva’erã ihaipy ypykuéra ñe’ẽme oguerekóva heranga, PDF-pe, ha avei ambue kuatai PDF-pe oñembohasahápe ojepuru katuivéva hetãme, oguerekóva avei heranga.

Oñembojopóita ha’evévape 2 jasypakõime, Feria Internacional del Libro de Guadalajara (FIL)-pe. Viru oñeme’ẽtava, peteĩmente, 300 mil México virúpe. Umi oikuaasevéva marandu ko ñoha’ã rehegua, ikatu oike ko’ápe: www.udg.mx.

Ko ñoha’ã paháma ojejapóva ombosako’i joajúpe Instituto Nacional en Lenguas Indígenas (INALI), Instituto Nacional de los Pueblos Indígenas, Secretaría de Cultural federal, Secretaría de Educación Jalisco, Secretaría de Cultura Jalisco ha Universidad de Guadalajara.


Compartir esta noticia

Últimas Noticias Publicadas