Ñe’ẽryru yshir ñe’ẽmegua ojehupíma avei SPL ñandutirogue marandurendápe

Paraguái Ñe’ẽnguéra Sãmbyhyha (PÑS) omomarandu oĩmaha iñandutirogue marandurendápe pe ñe’ẽryru yshir rehegua, ypykuéra Yshir ryepýpegua ha PÑS mba’apohára ombosako’íva’ekue oñondive. Ko tembiapo rupive PÑS oikuaauka ojepytaso mbareteha ypykuéra ñe’ẽ rehehápe, ko’ãva oñeñangareko ha oikove katui hag̃ua tembiporupyahu ñepytyvõme.

Ñe’ẽryru yshir rehegua, tembiapoguasuete ombyaty ha oñongatúva ko aty ñe’ẽndy, ojejuhúma ko’ág̃a formato digital-pe mayma oiporusévape g̃uarã.

Ko tembiporu oipytyvõ mbarete ojeikuaa hag̃ua Yshir ñe’ẽ ha upekuévo avei oñemokyre’ỹ hag̃ua ijeporu umi ñemoñare pyahúpe.

Ko tembiapo ryepýpe, karai Andrés Ozuna, peteĩva umi apohára apytépe oĩva he’i: “Oréve g̃uarã, Yshir ñe’ẽ oñeñonatúramo formato digital-pe tuicha oipytyvõta ko ñe’e oñeñangareko ha hekove mbarete hag̃ua. Ko ñe’ẽryru ndaha’éi oipytyvõva pe ñe’ẽ puruhárape añónte, katu kóva oipytyvõta avei mayma oikuaase ha oikũmbysévape ko ñe’ẽ”.

PÑS omba’apo kyre’ỹ oúvo ypykuéra Yshir guáva ndive oñemoañete hag̃ua ko ñe’ẽryru toguerekopaite ko ñe’ẽ rekopy ha rekojoparaita. Ko apopyrã rupive PÑS omoañete hembiapotee Paraguái ñe’ẽita ha arandupy rehehápe.

Yshir ñe’ẽryru ikatúma ojehecha PÑS ñandutiroguépe: https://spl.gov.py/vocabulario-yshir/, mayma tapicha oiporuséva oiporu hag̃ua ohepyme’ẽ’ỹre mba’evete. Paraguái Ñe’ẽnguéra Sãmbyhyha oipepirũ opavavetépe oiporu hag̃ua ko tembiporu ha ojeiporukuévo toñemyasãi ko’ã ypykuéra ñe’ẽ.