Ñembyatypy Eusebio Ayala tavaópe ñe’ẽnguéra rehehápe

Umi Unidad de Asuntos Lingüísticos (UAL) ñemopyendarã rekávo taha’e tavao ha tavusuokuéra ryepýpe, ojerureháicha Tembiapoukapy 6797/17, oñeg̃uahẽ oikóvo heta távape ha umíva apytépe oñeg̃uahẽ avei Eusebio Ayala tavaópe, Cordillera tavusúpe ikatu hag̃uaícha oñeñe’ẽ imburuvichakuérape umi tembiapoukapy ñe’ẽ rehegua oñemboguatava’erã.

Kuñakarai Estela Marís Machuca Ferreira, omoakãva Tekombo’e, Arandupy ha Tetã Jehechaukapy Renda ha Freddy Narciso Gauto Benítez, Temimoĩ Rekome’ẽmby Moakãhára omog̃uahẽ hembiaporendápe umi PÑS mba’apohárape, ko’ãva apytépe oĩkuri José Quiñonez, Esmilse Ramírez, Karin Mendoza, Rossana Arias ha Ángel Ovelar.

Ko ñembyatypy aja oñeñe’ẽ Léi 4251/10 ñe’ẽnguéra rehegua rehe, avei léi 6530/20 Lengua de Señas rehegua ha Decreto Reglamentario 9274/23 rehe ha avei mba’éichapa ikatu omba’apo ko’ã mokõi temimoĩmby oñemombarete hag̃ua ñe’ẽnguéra tee ko távape.

Ko tavao mba’apohára oĩva’ekue imburuvicha rérape ohecha porã ko’a tembiapoukapy oñemog̃uahẽva ichupekuéra ha opyta omba’apóvo ko temimoĩmby guive oñemombarete hag̃ua mokõive ñe’ẽ tee ha oñeñangareko hag̃ua avei ñe’ẽjoparaeta rehe ha upekuévo avei omba’apóta hikuái oñemoĩ hag̃ua peteĩ tapicha katupyry omoakãtava UAL ko tavaópe.

Ko’ã tembiapo oñemboguata ojejúvo oñemombarete hag̃ua ñane retã ñe’ẽkõi tee ha Léi 6530/20 Lengua de señas rehegua ha hembiapoukapy ñemyasãi ha jeikuaarã.