Oñemba’apo mbarete ojejúvo Tetã Mbo’ehaovusu Canindeyú-pe ñe’ẽnguéra rehehápe

Mba’apoharakuéra Ñe’ẽnguéra Rape’apo Moakãhapavẽ ha Lengua de Señas Moakãhapavẽmegua, PÑS ryepýpegua, Esmilse Ramírez ha Karin Mendoza oñe’ẽkuri Léi 4251/10 Ñe’ẽnguéra rehegua, ha Léi 6530/20 Lengua de Señas rehegua ha upéichante avei Tembiapoukapy  9274/23 rehe ikatu hag̃uáicha oñemombarete ha oñeñangareko ñe’ẽita rehe.

Karai Mariano Pacher, mbo’ehaovusu motenondehára ha Aristides Britos, FACIV sãmbyhyhára omog̃uahẽ  hembiaporendápe PÑS mba’apohárape, oĩ avei upépe ambue moakãhára omyakãva umi mbo’ehaovete.

Ko tembiapo oñemboguata ojejúvo oñemombarete hag̃ua tetã ñe’ẽkõi ha upekuévo avei oñemoherakuã hag̃ua Léi 6530/20, lengua de señas rehegua ha tembiapokapy hesegua.

Ipahaitépe mburuvichakuéra ko mbo’ehaovusúpegua he’i omba’apotaha ojehekombo’e hag̃ua imbo’eharakuérape lengua de señas-pe, kóicha ojehechakuaa ha oñemomba’eguasu hag̃ua tapichakuéra oiporúva ko ñe’ẽ derécho.