PÑS og̃uahẽkuri San Pedro tavusuópe oñembohape hag̃ua ñe’ẽnguéra jeporumeme

Ko temimoĩmby pytyvõharapavẽ Roberto Aluanez Speranza, karai gobernador pytyvõharaite Juan Arnaldo Almirón, avei gabinete moakãhára karai Gustavo Javier Cardozo Brizuela ha Arandupy sãmbyhyhára Anastasia Nélida Aguiar de Ramírez omog̃uahẽ hembiaporendápe PÑS mba’apoharakuéra Laureano Lezcano, Esmilse Ramírez, Karin Mendoza ha Saturnina Díaz Molinas-pe.

Ko ñembyatypy aja oñeñe’ẽ Léi 4251/10 Ñe’ẽnguéra Rehegua rehe, Léi 6530/20 Lengua de Señas rehegua ha Decreto Reglamentario hesegua 9274/23 rehe. Upéichante avei, upe ñemongeta aja oñeñe’ẽ ha oñehesa’ỹijo mba’eichaitépa ikatukuaa oñemba’apo oñondive oñemombarete hag̃ua ñe’ẽnguéra umi 22 táva opytáva ko tavusuo ryepýpe.

Ipahaitépe, oñeñe’ẽ avei iporãva’erãha ko’ã léi oñemog̃uahẽ avei umi táva moakãharakuérape ha upéicha toñemoañete tetãyguára tavusugua derécho ñe’ẽ rehegua oguerekóva.