Sãmbyhyhára Javier Viveros omomba’eguasu guaraní ñe’ẽ ta’ãngambyry América Paraguay-pe

Paraguái Ñe’ẽnguéra Sãmbyhyhára, karai Javier Viveros oĩkuri programa ta’ãngambyrypegua hérava Buen Día América” América Paraguay rupive oñembohasáva, upépe oñe’ẽkuri mba’e rupípa guaraní ñe’ẽ tuichamba’e ha mba’érehepa oñemomba’eguasuva’erã. Oñe’ẽ aja he’i iporãva’erãha oñemokyre’ỹ ijeporu ha oñeñangareko katuiva’erãha, ko’ýte guaraní ñe’ẽ arapokoĩndy ryepýpe.

Upéichante avei, imandu’a jopói “Rohayhu Che Ñe’ẽ” 2024 rehe, oikótava ág̃a araapy 26 jasypoapy, 10: 00 aravo jave, Tetã Ñoa’ãngatu Sãmbyhyha kotyguasúpe, ko’ápe ojehechakuaáta umi tapicha ha temimoĩmby ohayhu añetéva guaraní ñe’ẽ ha ojepytaso mbaretéva oñemyasãi ha herakuã porã hag̃ua oparupiete.