Oñeguenohẽ ha oñemyasãi mombe’upuku Pedro Páramo, ñe’ẽkõi guarani-castellano-megua

Mombe’upuku recharamomby Pedro Páramo, karai Juan Rulfo rembiapokue, oñemoñe’ẽasáva guaraníme, ojehechauka ha oñemyasãi ñepyrũkuri Congreso Nacional Biblioteca ha Archivo Central Kotyvusúpe. Ko ñe’ẽasa opytákuri haihára ha ñe’ẽpapára recharamomby Susi Delgado pópe.

Ko ñe’ẽasa oñemboguata tembiapojoaju Paraguái Ñe’ẽnguéra Sãmbyhyha, Tetã Arandupy Sãmbyhyha ha México Embajada Paraguáipegua omboguatáva ryepýpe. Ko tembiapo oykeko mbarete avei Academia Paraguaya de la Lengua Española ha Guarani Ñe’ẽ Rerekuapavẽ.

PÑS oñemongeta Agencia Literaria Carmen Balcells rérapegua ndive, kóva ha’e rupi Juan Rulfo rembiapo járatee ha temimoĩmby oñangarekóva iñapytu’ũroky rehe, ko’ãva omoneĩ rupi oñemoñepyrũ oñemboguata ko haipy ñemoguarani, kóva ha’e rupi peteĩva umi novela omoñepyrũ ha ohechaukavéva pe realismo mágico ha ojeroike mbaretéva pe movimiento hérava «boom latinoamericano» ryepýpe.

Paraguái Ñe’ẽnguéra Sãmbyhyhára, karai Javier Viveros, omomba’eguasu ko tembiapo oipytyvõta rupi guaraníme, ha’éva upe ñe’ẽ ojeporuvéva Paraguáipe, ha he’ijey jey ko tembiapo guasuete oipytyvõ mbaretétaha ko ñe’ẽ oñemboyvateve ha ojeporumeme hag̃ua opaite hendápe ha opaite mba’erã.

Ko aranduka oĩva mokõi ñe’ẽme, guarani ha castellánome oñemyasãi Editorial Rosalba rupive ha ojejuhukuaa aranduka ñemuha El Lector ha Ediciones Técnicas Paraguayas-pe.