Apopyrã «Normalización y Acompañamiento de la Política Lingüística Nacional» ryepýpe, Paraguái Ñe’ẽnguéra Sãmbyhyha ( PÑS). Moakãharapavẽ Ñe’ẽ rape’apo rupive , oho Karia’y ha Kuñataĩ Ykeko Sãmbyhyhápe ohechávo mba’éichapa ogueroguata hembiapo ha upéicha omboysýi hag̃ua Léi Ppy4251/10 jeguerojera ha avei Decreto Reglamentario Ppy 6797/20217.
Ñombyaty aja, ojehechauka mba’éichapa PÑS oguerojera tembiapo ñemoirũ ombarete rekávo ñe’ẽkuaaty jeporu temimoĩmbyhárupi ha tojeykeko oñemboajévo tavayguakuéra ñe’ẽ rehegua derécho ojeiporuhápe administración pública-pe mokõi ñe’ẽtee Paraguái pegua.
Upéramo, PÑS ome’ẽ oñemoguaranipyréva temimoĩmbýpegua tembipota, tembihecha ha Karia’y ha Kuñataĩ Ykeko Sãmbyhyha mba’éicha oñembosako’i, ko tembiapo ñemoirũhapegua oipytyvõta oñemombarete hag̃ua temimoĩmbýpegua ñe’ẽkõi jeporu ha umi mokõive ñe’ẽtee jehechakuaa.
Upéicha avei, mokõive temimoĩmby oñemoĩ peteĩ ñe’ẽme ojeiporavo hag̃ua Ñe’ẽnguéra Ñembohapeha Rendápe g̃uarã oisãmbyhýtava ha imoirũhára, tojegueroguata mba’apoharakuérape g̃uarã mbo’esyry ikatuhag̃uáicha ojehesape’a ichupekuéra ñe’ẽ jeporu ha ijapoukapykuéra ko’ág̃aguápe, toñemombarete guarani ha castellano jeporu temimoĩmbyháicha, taha’e ayvu ha jehaipýpe, ha péicha toñembosako’i mba’éichapa temimoĩmbýpe oñemba’apóta, ha ombohapétava normalización lingüística-pegua tembiapoita.
Ko’ã tembiapo rupive, Paraguái Ñe’ẽnguéra Sãmbyhyha omombarete iñe’ẽme’ẽ omoirũvo Estado-pegua organismo ha entidad ojeykeko rekávo gestión pública ojegueroikevéva, iñe’ẽkõiva ha omomba’éva maymave tavayguakuéra ñe’ẽnguéra rehegua derécho.
