Oñemba’apo kyre’ỹ ojejúvo guarani ñe’ẽayvu ñeñongaturã

Paraguái Ñe’ẽnguéra Sãmbyhyha mba’apoharakuéra og̃uahẽ ko arapokoindýpe mbohapy táva San Pedro-guápe omba’apove hag̃ua oúvo tembiapoguasu hérava «Registro del guaraní oral a partir de relatos de hablantes nativos de la lengua mayores de 60 años» ryepýpe. Ko apopyrã iñepyrũmbýpe ogueroikéta 21 távape, 7 tavusuguápe oĩva Región Oriental-pe, oñondivepa ohupytývo amo 60 tapicha ikarai ha ikuñakaraivéma omombe’úva hembiasakue.

Ko tembiapo oñemongue Ñe’ẽnguéra  Rapereka Moakãhapavẽ guive, PÑS ryepýpegua, ha hendive oñemoheñoise peteĩ ñe’ẽ’aty guarani ñe’ẽayvu rupive, ogueroikétava tekopy okaháregua yma ha ko’ág̃agua, aranduka’aty, jepokuaa, jeroviapy, ñemitỹ, tembi’u reko ha ambueve mba’e.

Guarani ñe’ẽ ayvu ñeñongatu ojejapóva ojejúvo oñehendu rire umi karai ha kuñakarai 60 ary oguerekóva guive rembiasakue ha ko’ýte umi guarani ñe’ẽ añónte oiporúva ojeporúta avei ñe’ẽ ñembokuatia, ñehesa’ỹijo, ñemohenda ha ambue raperekarã.&nbsp

PÑS rérape oĩkuri Abelardo Ayala, Biera Cubilla, José Quiñónez ha Ramón Herrera. Umi táva San Pedro-gua oñeg̃uahẽhápe ha’ékuri Resquín, Yrybucuá y San Estanislao.

Umi tavusu ojeiporavóva oñeg̃uahẽ hag̃ua ñepyrũrã apytépe oĩ : Guairá, Caaguazú, Caazapá, Paraguarí, Misiones, San Pedro ha Cordillera. Peteĩteĩ tavusúpe oñeg̃uahẽta mbohapy távape, oñeg̃uahẽ ha oñemba’eporadúvo amo 60 tapicha rupi, oñemohu’ãvove ko ñe’ẽ rapereka.