PÑS oheka Tembikuaareka Ñe’ẽ Rehegua Jeporavopyre ombojopói hag̃ua.

Ojeikuaaukáma Tembikuaareka Ñe’ẽnguéra Rehegua Jeporavo Arypegua, 2024.  Ko tembiapo kuaaukapy oikókuri Tetã Ñoa’ãngatu Sãmbyhyha (TÑS) Kotyguasúpe ha upépe oĩkuri heta mbo’ehára, tembikuaarekahára ha ambue tapicha omoirũva’ekue ko tembiapo porãite.

Ko apopyrã ombosako’i Paraguái Ñe’ẽnguéra Sãmbyhyha (PÑS) ha omokyre’ỹse tembikuaareka pyahu ñe’ẽnguéra rehegua ha tojekuaauka kuaaita osẽva ichugui. AranduPy oipytyvõta ojehechakuaa ha oñembojopói hag̃ua umi tembiapo ohapereka ha ohesa’ỹijóva Paraguái ñe’ẽita. “Peteĩ tetã remimoĩmby ohechakuaáramo ko’ãichagua tembiapo poravopyre, avei omyasãiramo og̃uahẽ hag̃ua maymavépe oykeko ha omoañete mba’e rupípa tuichamba’e ko jehechakuaa oñembosako’íva”, upéicha he’íkuri karai Javier Viveros, Paraguái Ñe’ẽnguéra Sãmbyhyhára (PÑS).

Ko aty ojeikuaaukahápe ko apopyrã oñemyesakã avei umi jehaipy oñemog̃uahẽva ohaperekava’erãha oimeháichagua Paraguái ñe’ẽita reko, ojegueroikévo avei mokõive ñe’ẽ tee (guaraní ha castellano), umi 19 ypykuéra ñe’ẽ, pytagua ñe’ẽ oikovéva ñane retãme, ha upéichante avei iñe’ẽngúva ñe’ẽ Paraguaipegua rehegua. Avei, oje’e ko’ã tembikuareka ikatuha ojehai peteĩva tetã ñe’ẽ teépe.

Kuñakarai Ana Martini, terekuára Academia Paraguaya de la Lengua Española (APARLE) -pegua oĩ avei ko atyhápe ha ombovy’apavẽ PÑS oguerojeráre ko tembiapo ha he’i avei ko’ã tembiapo rupive oñehesa’ỹijo ha ojehapereka tekopy, oñemombarete hag̃ua ñande rekotee ha upekuévo ombohape py’aguapy, jeikokuaa, akãrapu’ã joja ha arandupy ha mba’ekuaa porã gotyo.